Medibuntu: adiós y munches gracies

15 d'Ochobre de 2013 por Xuacu

medibuntu-logo_64Hebo un tiempu en que pa poder ver determinaos conteníos de la rede, los usuarios de les distribuciones de Linux teníamos que «buscanos la vida» p’alcontrar distintos complementos, biblioteques o programes y, de vezu, compilar fontes de software non-llibre.
Dempués, gracies al trabayu de distintes persones, apaecieron paquetes yá preparaos pa les distintes distribuciones. Pero siguíen esistiendo dos problemes: había qu’alcontralos pela rede, echando tiempu nos buscadores, y podíen ser paquetes pa versiones anteriores de la distribución, que dacuando daben problemes de compatibilidá.
Too esto ameyoró enforma cola llegada de Medibuntu, un repositoriu de paquetes non llibres de multimedia pa Ubuntu, que permitía tener accesu fácil a paquetes actualizaos dende’l propiu Centru de Software del sistema.
Pero toles coses lleguen al so final, y agora toca-y a Medibuntu. Col pasu del tiempu bona parte de los paquetes pasaron a tar integraos dientro de los repositorios oficiales, otros yá nun son necesarios o tan anticuaos, y l’únicu que, por cuestiones llegales, nun pue tar integráu n’Ubuntu (libdvdcss), úfrese dende Videolan. Poro Gauvain Pocentek, encargáu de Medibuntu, decidió que yá nun ye necesario caltener el repositoriu. Si teníeis Medibuntu activáu nos oríxenes del software, hai díes que taréis recibiendo mensaxes d’error nos anovamientos del software d’Ubuntu.
Pa desactivar el repositoriu de Medibuntu hai que dar nun terminal la orde siguiente:
sudo rm /etc/apt/sources.list.d/medibuntu.list
Pa usar el repositoriu de Videolan, que da accesu a libdvdcss (necesario pa reproducir dvds protexíos) son necesarios los siguientes comandos:
curl ftp://ftp.videolan.org/pub/debian/videolan-apt.asc | sudo apt-key add -
echo "deb ftp://ftp.videolan.org/pub/debian/stable ./" | sudo tee /etc/apt/sources.list.d/libdvdcss.list
sudo apt-get update

Y si t’alcuentres pela rede foros o artículos que redirixen a Medibuntu, por favor, informa a los llectores de qu’esa solución yá nun ye válida.
De mou que munches gracies a toles persones que collaboraron pa que los usuarios d’Ubuntu tuviéramos accesu a los mesmos conteníos (y más, munches veces) que los usuarios d’otros sistemes operativos.
Equí ta la noticia n’inglés nel blog de Gauvain Pocentek.