Tocante a Softastur

Quién somos.

Softastur somos una asociación ensin ánimu de llucru que trabaya pol Software Llibre en llingua Asturiana. Ente los nuesos proyeutos tán la llocalización a llingua asturiana del Sistema Operativu Ubuntu, Firefox, LibreOffice, Thunderbird, .. aplicaciones d’escritoriu (+70) y dalgunes aplicaciones pa teléfonos (smartphones). (ver equí dalgunos de los proyeutos)

 

¿Por qué Software llibre?

Primero por llibertá. Tamién por ética y por tresparencia. La llibertá qu’ufre’l códigu abiertu fai que no tocante a la nuesa llingua, nun tengamos que depender munches vegaes de decisiones d’otros.

 

¿Por qué en llingua asturiana?

Porque ye la nuesa llingua. ¿Esperabes otra rempuesta?

 

¿Cómo vos financiais? ¿Tenéis dalguna mena de subvención?

Non. Nun tenemos subvenciones, y refugamos abiertamente a elles, y anque taríen xustificaes creemos que son más necesaries pa otros proyeutos. El dineru necesariu pa los gastos de les actividaes de l’Asociación, o sirvidores, material y/o dominios, sal direutamente de los bolsiellos de los miembros. Pol calter non llucrativu de la nuesa asociación, usamos servicios de baldre y el sofitu téunicu que nos ufren Free Software Foundation, ó Canonical, ente otros. Nun tenemos publicidá na nuesa páxina web, colo que tampoco tenemos ingresos per esa vía.

 

¿Cómo foron los vuestros comienzos?

Por necesidá social. Fai unos 10 años, la llingua asturiana tenía una representación ínfima nes nueves teunoloxíes. Sicasí, la sociedá asturiana demandaba más y más, (cosa que dende les instituciones nun se satisfacía; non sólo nes nueves teunoloxíes, sinón en xeneral). Lo mesmo que n’otros campos, vimos la necesidá d’ufrir a los usuarios les ferramientes que día a día diben entrando nes nueses vides. N’aquellos años, un garrapiellu de persones entamaron a abrir l’espaciu que l’asturianu necesitaba nel mundu, averando les nueves teunoloxíes al idioma d’Asturies. Como nes sociedaes NORMALES.

 

Quiero pasame a Ubuntu, ¿Cómo lo faigo?

Bona decisión. Dende la páxina d’Ubuntu pues descargate’l sistema operativu completu y gratuitamente. Grábeslu nun CD arrancable (booteable), inxérteslu nel PC y instálase fácilmente siguiendo los pasos. Nun tien virus y ye MUI fácil d’usar. Si usabes Windows tienes la opción de caltenelu y compartir dambos sistemes operativos. Ye fácil, y dende’l menú pues escoyer la llingua asturiana. Si nun t’atreves ponte en contautu con nós, o aprovecha p’asistir a dalguna de les “install parties” qu’organizamos p’ayudar a xente. Los anuncios de les “install” fáense dende la nuesa páxina web

 

¿Qué ye LibreOffice?

LibreOffice ye’l competidor direutu de “Microsoft Office”. Ye una suite ofimática qu’inclúi un editor de testos, una fueya de cálculu, presentaciones, etc. Ta disponible en llingua asturiana, y pues descargalu tanto pa Ubuntu como pa Windows y Mac, por ser multiplataforma. Ye totalmente compatible colos formatos .doc, .xls, .ppt …  Equí tienes más info y razones pa usalu

 

¿Por qué tendría d’usar Firefox?

Primero porque ye Software llibre. Dempués, porque ta disponible n’asturianu. L’ecosistema de complementos de Firefox ye de los meyores qu’hai, y la seguridá, PRIVACIDÁ, y compromisu col usuariu ye seña de la Comunidá que lu fai, Mozilla. Arriendes, l’usu de Firefox en llingua asturiana, identifícate na rede como usuariu d’esta llingua (‘ast’). Ye un mou de dicir “tamos equí, esistimos”. Sorprenderíavos saber lo importante que ye esto pa una llingua de cara al futuru. N’internet, les estadístiques cuenten, y muncho.

 

¿Qué más aplicaciones tengo pa usar n’asturianu nel PC?

Aparte del Sistema Operativu Ubuntu, tamién pues usar reproductores tan afamaos como VLC, o’l xestor de corréu Thunderbird. Dispones d’un Correutor Ortográficu tanto pa Firefox, como pa Ubuntu, como pa LibreOffice. Y tamién Language Tool, correutor Gramatical. GIMP, un editor gráficu,..etc (ver esta llista d’aplicaciones). En cuanto a apps pa smartphones, pues usar el Diccionariu de la ALLA xunto cola ferramienta eslema nuna sola app.

 

¿Y Android?

Android ye ún de los proyeutos nos que tamos trabayando. Yá ta disponible una versión de pruebes mui avanzada, y tamos esperando que salga la versión estable nunos meses, que tará disponible n’asturianu. El proyeutu desendólcase baxo Cyanogenmod (Android), disponible pa más de 80 teléfonos móviles y tabletes. Si quies ser una de les persones que quier probalu yá, ponte en contautu con nós dende la páxina de contautu de Softastur.

 

¿Por qué nun facéis una versión iOS?

¿Por qué díbemos a querer trabayar con un sistema escluyente? La llingua asturiana nun tien cabida nesi sistema, darréu de les polítiques zarraes d’esa empresa. Llei equí tocante al tema..

 

Acabo de descargame Telegram n’asturianu p’Android. ¿Pa cuándo Whatsapp?

Lo mesmo que iOS, whatsapp nun ta disponible en códigu abiertu, Android . La eleición tienla siempre l’usuariu..

Los comentarios tan zarraos