De momentu paez que la puxarra tien l’orixe nun robot que gueta pallabres como Libreoffice nos titulares d’artículos pa mandar comentarios con spam y, seique, malware nos enllaces. Poro, pa quitanos el trabayu de tener que desaniciar continuamente esos mensaxes, toi acabante de torgar los comentarios neses entraes del blog. Dende que s’espublizaron hai entraes más nueves sobro Libreoffice, y nun tendría de ser necesario comentar ehí; sicasí, si realmente necesites amestar un comentariu, usa’l nuesu formulariu de contautu y veremos la manera d’igualo.

Ensin esta incorporación. les llingües tan condenaes a la minorización ya l’escaezu. Sicasí, los fabricantes de software privativu nun tienen interés más que nel garapiellu de llingües que tienen cientos de millones de falantes, escaeciendo (y, dacuando, torgando) l’accesu a la teunoloxía de los falantes d’otres milenta llingües, como ye’l casu de la llingua asturiana.

Por suerte, la llóxica del máximu beneficiu económicu nun ye la del Software Llibre, que tien l’envís de buscar el máximu beneficiu social (lo que nun quier dicir que col Software Llibre nun pueda tenese tamién un beneficiu económicu). Y ye equí onde la propia comunidá de falantes tien la capacidá de defender el futuru de la llingua materna. Nes nueses manos tenemos les ferramientes afayadices pa qu’esista software na llingua llariega, qu’en munchos casos son les meyores aplicaciones esistentes, y sólo depende de nós el llugar que queramos qu’ocupe la nuesa llingua.

En Softastur queremos que la llingua asturiana siga tando ente les primeres no que cinca al software disponible, y prestaríanos dar les más fonderes gracies a toles persones que collaboren pa consiguilo, especialmente a los que s’animen a usar les aplicaciones n’asturianu y nos comenten la so esperiencia, lo que se pue meyorar y los fallos que puedan tener. Porque, al final, lo más importante del software son les persones que lu usen.

El plan de llanzamientos de LibreOffice tien l’envís de que convivan al mesmu tiempu trés families d’esti conxuntu d’aplicaciones. Una d’elles, la que tenga la numberación más baxa, (nesti casu, LibreOffice 3.5.7) ta destinada a los usuarios más conservadores, que prefieren que nun s’amiesten cambeos al software qu’usen. La segunda familia, que tien una numberación intermedia, (anguaño, LibreOffice 3.6.5) ye la que se recomienda pa los usuarios normales. Nun hai grandes novedaes ente les versiones d’esta familia recomendada, pero corixense fallos que puedan apaecer col usu normal. Y la tercera versión, que tien el númberu más alto (LibreOffice 4.0) ye onde apaecen les nueves carauterístiques que s’amiesten a les aplicaciones.

Cuando apaeza otra versión principal, declarase’l fin de ciclu de la versión más antigua y les siguientes versiones pasen a ocupar la categoría de la anterior. Si quies saber el calendariu previstu de llanzamientos de LibreOffice, pues consultalu equí.

Como de vezu, si t’alcuentres con dalgún fallu, quies saber más, o pues echanos un gabitu pa traducir o facer el control de calidá d’estos programes, ponte’n contautu con nós.

Apache Open Office

De xuru que munchos conocéis OpenOffice y taríeis entrugándovos qué pasó con esti vieyu amigu que nun se supo más d’él dende que Softastur anunció la traducción al asturianu d’estes aplicaciones d’oficina nesti enllaz. El casu ye que la traducción al asturianu d’OpenOffice siguió alantre con cada versión. Pero la historia nunca ta quieta y nel añu 2010 Oracle mercó Sun Microsystems, la empresa a la que pertenecía n’aquel momentu OpenOffice, pasando a ser Oracle la propietaria d’OpenOffice. Al mesmu tiempu, y darréu de ciertes duldes sobro’l la propiedá de la marca comercial, pasó a usase OpenOffice.org como nome d’estes aplicaciones.

El 1 de xunu de 2011 Oracle dona’l proyeutu ya’l productu, incluyendo códigu fonte, marques comerciales y dominios web a The Apache Foundation. El cambiu a esta fundación, que tien el so orixe nel famosu sirvidor web; pero que desendolca munchos más proyeutos, tuvo dos consecuencies. La primera, el cambiu de llicencia del software de la LGPL 3.0 a la Llicencia Apache versión 2.0

En segundu llugar, OpenOffice tuvo que pasar polo que se llama «incubación», un periodu onde un proyeutu tien que demostrar la so fuerza pa llegar a la «graduación» como proyeutu de primer nivel. OpenOffice graduóse nel aconceyamientu de la direición de la ASF del pasáu ochobre de 2012. Pero tou esti procesu llevó a una nueva manera de trabayar que torgó qu’apaecieren nueves versiones n’asturianu del software. Les traducciones anteriores siguíen esistiendo, pero nun había un paquete d’instalación dafechamente n’asturianu.

Sicasí, el trabayu nun paró y, dende ayeri vuelve a tar disponible la instalación completa direuta d’OpenOffice n’asturianu, incluyendo la interfaz ya’l correutor ortográficu, pa sistemes Windows, MacOS y Linux. Si quies probalu o anovar una versión anterior, nun tienes más que descargar la versión OpenOffice 3.4.1 pal sistema qu’uses dende esta páxina. Y pa cualesquier dulda o fallu que puedas alcontrate, ponte en contautu con nós ensin dengún compromisu y procuraremos echate un gabitu.

Esta versión de VLC inclúi munches traducciones anovaes, incluyendo incluyendo per primer vegada traducción en llingua asturiana, amás de en bengalí (India), bosniu, checu, croata, danés, estoniu, holandés, francés, gaélicu escocés, gallegu, alemán, italianu, hebréu, xaponés, malayalam, khmer, polacu, chinu tradicional, chinu simplificáu, eslovacu, portugués brasileñu, tailandés y turcu.

Aspeutos destacaos de VLC 2.0.5:

•     Corrixóse la deteición del sistema d’entrega DVB-S;

•     Corrixóse la sincronización inicial de PulseAudio al reproducir ficheros;

•     Corrixóse un problema coles fontes de los subtítulos;

•     Corrixóse un problema de llenáu de búfer col parseador de subtítulu HTML;

•     Corrixóse’l parseador lua koreus;

•     Soporte ameyoráu pa los streams RTSP recibíos dende delles cámares IP;

•     Corrixéronse numberosos bloqueos de MKV;

•     Corrixóse un fallu rellacionáu colos ficheros SWF malformaos;

•     Corrixóse un problema de Freetype rellacionáu coles fontes incrustaes;

•     Corrixóse la relación d’aspeutu incorreuta nos filtros de videu;

•     Corrixóse la inicialización de los codificadores de videu y audio MPEG-2;

•     Corrixóse la función de escoyeta de pistes de videu y audio en libVLC, qu’agora usa un identificador de pistes constante;

•     Otres meyores pequeñes y correiciones pa Mac VOS X y Windows.

DESCARGA

Collabora con Softastur informando de dalgún fallu d’ortografía, léxicu, etc, qu’atopes. Xuntos, somos meyores.

Magar que les traducciones de Joomla! yá taben feches dende l’añu 2008, enxamás vieron la lluz, pero gracies a la iniciativa de R.D.M ye posible qu’esti proyeutu tea disponible bien aína. Gracies a los que collaboren nesti proyeutu, y la meyor de les norabones!

• NOTA: Equí vos dexamos con un videu. Subtítulos disponibles en castellanu (Calcái en cc y usái l’eslizador coloráu de a mandrecha pa esbillar la llingua)

Click here to view the embedded video.

El próximu 17 de Payares (sábadu) a les 10:00, acude a la Casa la Cultura de L’Infiestu, y participa. Echarémoste un gabitu na instalación d’Ubuntu 12.10. Enantes d’acudir, llei la info en: http://docu.softastur.org/Install

Seis meses dempués del llanzamientu de Thunderbird en llingua asturiana, la versión d’esti afamáu xestor de corréu na nuesa llingua yá pue considerase miembru dafechu de la Comunidá. Hasta agora disponíemos d’él como una llocalización ‘beta’ (versión de llingües que tán en fase de pruebes y caltiénense baxo observación, como ye’l casu del Armeniu y el Croata.)

Dende yá, podemos dicir que Thunderbird v15 ‘ast’, forma parte de la Comunidá (ver toles llingües).Esta versión, amás, trai novedaes como’l chat, serviciu de ‘Non rastréu’, nueves funcionalidaes nel unviu de ficheros y una interfaz nueva d’usuariu. Tenéis más detalles equí.

Podéis descargalu dende equí. Ye cenciellu y mui fácil de configurar