Archivu de la categoría ‘Aplicaciones’

A celebralo un poco, y vuelta al trabayu

23 de Xunetu de 2013 por Xuacu

 

(Esti artículu ye una traducción del orixinal qu’apaez nel blog d’Apache OpenOffice)

Society of Artists' Selection Committee, Sydney, 1907 / photographer Henry King

Society of Artists’ Selection Committee, Sydney, 1907 / photographer Henry King by State Library of New South Wales collection, on Flickr

Norabona a la comunidá pol éxitu nel llanzamientu d’Apache OpenOffice 4.0.  Los detalles completos del llanzamientu puen alcontrase nes Notes de la versión.  Apache OpenOffice 4.0 pue descargase dende equí.

Esta foi una versión principal, onde munchos voluntarios ficieron un esfuerzu importante trabayando nel códigu, pruebes, traducción, sofitu, publicidá, documentación y otros aspeutos del proyeutu. Tamién ye necesario agradecer el sofitu continuu de les demás partes de la Apache Software Foundation, especialmente l’Equipu d’infraestructura d’Apache pol descomanáu encontu pal nuesu descomanáu proyeutu.

Ye’l branu, polo menos pa los voluntarios del hemisferiu norte,  y agostu ye tiempu de vacaciones.  Munchos de nós tomaremos un respiru pa pasar tiempu coles amistaes y la familia.  Pero más alantre volveremos a trabayar con tol enfotu, col focu puestu en:

  • Traer más traducciones d’otros idiomes a AOO 4.0.  Hai delles llingües que tan “casi feches”, pero que nun llegaron a tiempu a esti llanzamientu.  Pero, meyor qu’esperar fasta la 4.1, lliberaremos esos idiomes, en llotes, cuando tean disponibles.   En principiu pensamos en mediaos de setiembre pal primer llote.  Si te pruye aidar con una traducción determinada, taremos encantaos de sabelo.
  • Apache OpenOffice 4.1. Tenemos apuntaes delles idees propuestes na nuesa wiki.  Agora necesitamos tresformar eso nun plan, de mou ideal pa tener una versión 4.1 pa finales de 2013.

Finalmente, la transición d’una versión principal a otra, ye un momentu afayadizu pa que los nuevos voluntarios en toles árees se xunan al proyeutu.   Si t’interesa ayudanos a facer la siguiente gran versión d’OpenOffice, queremos saber de ti.  Nun somos namái programadores, sinón una comunidá de probadores, diseñadores de la interfaz, diseñadores web, escritores téunicos, espertos n’accesibilidá, traductores, espertos en redes sociales, etc.  Son bienveníos los voluntarios pa toles árees.   Pue alcontrase más información na nuesa páxina de collaboración y tamién equí, nel sitiu de Softastur.

Un pasu más

31 de Xineru de 2013 por Xuacu

LibreOfficeThe Document Foundation ta acabante d’anunciar nel so blog la salida de la versión 3.6.5 del conxuntu d’aplicaciones pa oficina LibreOffice pa Windows, MacOS y Linux y pue descargase de baldre equí. Esta versión, disponible como de vezu en llingua asturiana, va ser la cabera de la familia 3.6 de LibreOffice enantes de que la selmana que vien apaeza LibreOffice 4.0. Pero, espera… ¿dos versiones nuna selmana? ¿Qué ta pasando equí? (more…)

Vieyos amigos

31 de Xineru de 2013 por Xuacu
Logo Apache Open Office

Apache Open Office

De xuru que munchos conocéis OpenOffice y taríeis entrugándovos qué pasó con esti vieyu amigu que nun se supo más d’él dende que Softastur anunció la traducción al asturianu d’estes aplicaciones d’oficina nesti enllaz. (more…)

Aportó LibreOffice 3.6

9 d'Agostu de 2012 por Xuacu

LibreOffice

The Document Foundation anuncia LibreOffice 3.6 con un piñu de nueves carauterístiques y ameyoramientos

Berlin, 8 d’agostu de 2012 – The Document Foundation anuncia LibreOffice 3.6, el cuartu llanzamientu primariu del meyor paquete d’aplicaciones d’oficina de tolos tiempos, qu’ufre un gran númberu de carauterístiques nueves y un ameyoramientu incrementáu respeuto a les versiones anteriores. Les anovaciones van dende les carauterístiques invisibles, como la interoperabilidá y rindimientu ameyoraos, a les más visibles, como les igües na interfaz d’usuariu, onde los temes s’ameyoraron pa casar meyor coles bones práctiques nel diseñu d’anguaño. Hai una llista completa con imaxes de pantalla equí: http://www.libreoffice.org/download/3-6-new-features-and-fixes, porque una semeya diz más que mil pallabres.

Per uquiera que mires verás ameyoramientos: un nuevu importador de CorelDRAW, integración con Alfresco pel protocolu CMIS ya integración llimitada con SharePoint, escales de color y barres de datos en caxelles de fueya de datos, marques d’agua na esportación a PDF, función de formatu automáticu ameyorada pa les tables en documentos de testu, calidá alta nel escaláu d’imaxes, importación de Microsoft SmartArt pa documentos de testu, y xestión de CSV ameyorada. Amás, hai abondes collaboraciones del equipu de diseñu: un aspeutu más llimpiu, n’especial en PCs con Windows, guapes páxines maestres de presentación nueves, y nueva pantalla d’aniciu.

LibreOffice ta faciendose cada vegada más popular n’entornos empresariales. Nos caberos meses, dellos grandes muérganos públicos tienen fechu l’anunciu del so cambiu a les aplicaciones d’oficina llibres: la Rexón Capital de Dinamarca, les ciudaes de Limerick n’Irlanda, Grygov na República Checa, Las Palmas nes Canaries, la ciudá de Largo de Florida, el conceyu de Pilea-Hortiatis en Grecia, ya’l Sistema de Biblioteques Públiques de Chicago.

Dave Richards, de la Ciudá de Largo, comentó tocante al nuevu llanzamientu nel so blog: «Tengo feches pruebes con LibreOffice 3.6 y toi bien contentu de ver el so progresu. Nesti momentu toles torgues tan iguaes y probablemente nos anovaremos darréu tres el llanzamientu. Bon trabayu. Va tomando bona forma. Taré sollerte pa la 3.7 cuando apaeza nes versiones de prueba diaries».

En Francia, the MIMO Working Group – los ministerios d’Agricultura, Cultura y Comunicación, Defensa, Educación, Enerxía, Finances Interior y Xusticia (con un total de 500.000 usuarios finales), certificó LibreOffice pa la so instalación en cada escritoriu. Al mesmu tiempu, the OSB Alliance aconceyó los trabayos de les ciudaes y comunidaes d’Alemania y Suiza pa patrocinar el desendolcu sobro la base del códigu de LibreOffice.

Los usuarios corporativos tan xuniendose a los consumidores que cambiaron ceo a LibreOffice. Giorgio Buccellati, Profesor Eméritu d’Historia y Llingües del Cercanu Oriente na UCLA (University of California de Los Angeles), diz: «LibreOffice ye un software maraviyosu. Soi un usuariu incansable de la carauterística PDF Híbridu, que permite intercambiar ficheros PDF colos demás usuarios mentanto que conserves la posibilidá d’editar el mesmu documentu como un ficheru nativu».

LibreOffice 3.6 ta desendolcáu pola creciente comunidá de hackers aconceyada alredor de The Document Foundation, gracies a un entornu amistosu y afalador, y al espíritu convincente del Software Llibre. La comunidá yá pasó la llende de quinientos desendolcadores proporcionando nueves carauterístiques y parches dende l’anunciu del proyeutu el 28 de setiembre de 2010.

Acordies con Ohloh, LibreOffice ye la tercer mayor comunidá de desendolcadores que s’empobina a aplicaciones de software llibre, tres Google Chrome y Mozilla Firefox, y la mayor que ye independiente d’un únicu patrocinador corporativu. Esti resultáu s’algamó en menos de dos años, y anguaño ye un referente pa los proyeutos de software llibre.

The Document Foundation convida a los usuarios avezaos, capaces d’ayudar a iguar los problemes finales, a lleer con procuru les notes de llanzamientu, instalar LibreOffice 3.6.0, ya informar de cualesquier problema.  Los usuarios más conservadores tendríen de siguir con LibreOffice 3.5. S’encamienta que los usuarios corporativos desplieguen LibreOffice col encontu d’un serviciu profesional, d’una empresa que pueda dar asistencia cola migración, formación pa usuarios finales, sofitu y mantenimientu.

LibreOffice 3.6 ta disponible dende: http://www.libreoffice.org/download/

Pa collaborar col siguiente desendolcu de LibreOffice y The Document Foundation, puedes facer un donativu en: http://www.libreoffice.org/get-involved/donate/

Enllaz curtiu al blog de The Document Foundation que contién l’orixinal n’inglés d’esta noticia: http://wp.me/p1byPE-j8

LibreOffice 3.5 yá ta equí

14 de Febreru de 2012 por Xuacu

LibreOffice - The Document Foundation

The Document Foundation vien d’anunciar LibreOffice 3.5: «el meyor conxuntu d’aplicaciones llibres pa oficina, de tolos tiempos»

LibreOffice 3.5, ye la tercer versión principal del «meyor conxuntu d’aplicaciones pa oficina llibres de tolos tiempos», qu’ufre a los usuarios finales los ameyoramientos derivaos de la estratexa de desendolcu que s’adoptó de magar setiembre de 2010.  LibreOffice 3.5 vien del trabayu combináu de hackers a xornada completa (el mayor grupu de programadores espertos de códigu d’OOo) y hackers voluntarios, coordinaos pol Comité de Direición d’Inxeniería. Demientres 16 meses, una media de 80 desendolcadores cada mes proporcionaron en total más de trenta mil unvios de códigu, qu’amestaron nueves ya interesantes carauterístiques:

(more…)

Mozilla asoleya Thunderbird 10 en llingua asturiana

3 de Febreru de 2012 por paparresolla

Coincidiendo col llanzamientu de Firefox 10, la Fundación Mozilla espublizó güei mesmo Thunderbird 10, l’afamáu Xestor de corréu electrónicu. La novedá nesti casu, ye qu’esta versión inclúi la llingua asturiana, lo que nun asocedía dende la versión 1.0 (2004). Dempués de retomar aquel proyeutu y tres 1 añu de trabayu, Softastur tien el gustu de presentavos la versión que ta acabantes de salir, y que yá s’alcuentra disponible pa toles plataformes (Linux, Win, Mac).

Páxina de descarga: http://www.mozilla.org/ast/thunderbird/

Carauterístiques: http://www.mozilla.org/ast/thunderbird/features/

Novedaes: http://www.mozilla.org/ast/thunderbird/10.0/whatsnew

 

 

Asoleyáu Firefox 5

21 de Xunu de 2011 por Softastur

Mozilla espubliza güei la versión 5 de Firefox, el restolador web más usáu n’Europa y emblema del software llibre nel mundu.

Les meyores que destaquen na nueva versión son:

  • Ferramienta “Do Not Track”, cola qu’evitar el siguimientu d’usuarios por parte d’anunciantes (Permite refugar la publicidá personalizada)
  • Sofitu p’animaciones CSS.
  • Ameyorada la integración pa Linux.
  • Posibilidá de camudar ente les distintes versiones disponibles nos canales de desendolcu de Firefox dentro del propiu restolador.
  • Meyores nel rendimientu del motor JavaScript y nel sofitu HTML 5, XHR, MathML y SMIL.

Yá puede baxase de baldre pa tolos sistemes operativos y llingües
dende la direición oficial: http://www.mozilla.com/ast/firefox/

Firefox PORTABLE n’asturianu pa Windows, versión 4.0

23 de Marzu de 2011 por Softastur

Al día siguiente ya tenemos fecha la versión portable de Firefox 4.

Podeis usala por exemplu na Mochila Dixital d’Educastur.

Les ventaxes de la versión portable son munches:

  • USB: Puedes llevar Firefox nun llápiz USB calteniendo les tos preferencies (contraseñes, marcadores, botones…).
  • Ensin privilexos: Puedes executalu nun ordenador onde nun tienes permisos pa instalar programes (por exemplu nel trabayu, nel colexu…).
  • Nun camuda nada nel sistema: Si tas col ordenador de tos padres, trabayu, colexu… y nun quies/puedes instalar un programa por si s’estropea dalgo o inclusu que ya tea otru Firefox n’otra llingua, podrás usar la versión portable.
  • Nun dexa claves o perfil: Nun guarda datos de navegación, contraseñes, cookies… nel ordenador, sólo na carpeta onde ta descomprimíu :D

Esta versión pa Windows que t’ufrimos nun ye oficial, garramos la versión portable y usamos la torna de la versión oficial. Ficímosla porque pa dalgunes persones y/o en dalgunes situaciones, la versión portable ye perútil o inclusu necesaria.

Pa usala ye bien fácil: baxa esti ficheru ZIP, descomprímilu onde quieras (Nun USB, escritoriu, raíz…), accedes a la carpeta FirefoxPortable y executes en Windows el ficheru FirefoxPortable.exe cuando y onde quieras.

Resume de too esto:

  • Formatu: Portable
  • Versión: 4.0
  • Llingua: Asturianu
  • Sistema operativu: Windows

Mozilla asoleya Firefox 4.0

22 de Marzu de 2011 por Softastur

Dempués de 3 años de desendolcu dende la versión 3, Mozilla espubliza la versión final de Firefox 4. Anguaño, ún de los meyores restoladores web.

Podéis baxalu n’asturianu dende la direición oficial equí.

Les meyores son grandes na interface:

  • Llingüetes d’aplicación: Llingüetes siempre accesibles coles tos webs preferíes.
  • Menú compactu.
  • Llingüetes na parte cimera de la ventana.
  • Xestor visual de llingüetes mediante Panorama.
  • Nuevu xestor de complementos.
  • Nueva ventana de direiciones intelixente.

y muncho más que nun se ve:

  • Velocidá d’arranque: La sensación ye d’aniciar 5 vegaes más rápido que Firefox 3.
  • Muncho más livianu.
  • Sofitu nativu del códec WebM y WebGL 3D.
  • Sofitu del nuevu HTML5 onde esperimentarás un nuevu mundu cola web, pa exemplu, un botón.
  • Sincronización de marcadores, historial, contraseñes ente ordenadores incluída oficialmente.

Firefox PORTABLE n’asturianu pa Windows, versión 3.6.13

13 de Xineru de 2011 por Softastur

Una de les coses que más me prestaron siempre de Firefox ye la so versión portable, esa versión portable úsase por exemplu na Mochila Dixital d’Educastur.

Les ventaxes de la versión portable son munches:

  • USB: Puedes llevar Firefox nun llápiz USB calteniendo les tos preferencies (contraseñes, marcadores, botones…).
  • Ensin privilexos: Puedes executalu nun ordenador onde nun tienes permisos pa instalar programes (por exemplu nel trabayu, nel colexu…).
  • Nun camuda nada nel sistema: Si tas col ordenador de tos padres, trabayu, colexu… y nun quies/puedes instalar un programa por si s’estropea dalgo o inclusu que ya tea otru Firefox n’otra llingua, podrás usar la versión portable.
  • Nun dexa claves o perfil: Nun guarda datos de navegación, contraseñes, cookies… nel ordenador, sólo na carpeta onde ta descomprimíu :D

Esta versión pa Windows que t’ufrimos nun ye oficial, garramos la versión portable y usamos la torna de la versión oficial. Ficímosla porque pa dalgunes persones y/o en dalgunes situaciones, la versión portable ye perútil o inclusu necesaria :D

Pa usala ye bien fácil: baxa esti ficheru ZIP, descomprímilu onde quieras (Nun USB, escritoriu, raíz…), accedes a la carpeta FirefoxPortable y executes en Windows el ficheru FirefoxPortable.exe cuando y onde quieras ;)

Resume de too esto:

  • Formatu: Portable
  • Versión: 3.6.13
  • Llingua: Asturianu
  • Sistema operativu: Windows

PD: Ye importante que nun anoves la versión de Firefox, en casu de facelo, perderás que tea n’asturianu.

PD2: Ye la primer versión portable qu’espublizamos, si dalgo va mal, por favor, avísanos nos comentarios. ¡Gracies! En casu de dir too como debería tamién nos prestaría que nos avises :)