Archivu de la categoría ‘Aplicaciones’

POR FIN, FIREFOX N’ASTURIANU NEL SMARTPHONE

14 de Marzu de 2017 por paparresolla

En Softastur tamos arguyosos de notificavos que dende güei, yá podéis esfrutar de Firefox n’asturianu nel smartphone. Porque la to llingua identifícate y faite visible na rede.

Los usuarios de smartphones Android ya iOS, tiénenla disponible nes sos respeutives tiendes d’aplicaciones.

Pa ello, namái baxa Firefox dende Google Play (p’Android v5.0+) o App Store (iOS 9).
Tamién pues facelo dende estes páxines web:

En tolos casos, tendrás que dir a los axustes del to smartphone, y na configuración, camudar la llingua a Asturianu. Nel casu d’iPhone:

Dende Softastur, a toos, munches gracies.

Ruempi la muria llingüística con Mitzuli

4 d'Avientu de 2015 por enolp

Dientro’l públicu asturfalante siempres hebo la necesidá de cuntar con ferramientes de traducción afayadices que o nun se sabía qu’esistíen, o nun yeren práutiques d’usar nun preséu móvil o tableta. Güei Softastur ta arguyosa d’espublizar la traducción de Mitzuli.

 

captura1

 

Mitzuli ye un traductor llibre y de baldre col que podrás traducir con munches pareyes de llingües, que nel nuesu casu (pel momentu) llimítense a Asturianu <-> Español. Esta aplicación furrula gracies a otros proyeutos llibres como Apertium (ufre’l motor de traducción pa munches pareyes de llingües y el qu’usa Eslema), Tesseract (ufre reconocencia visual de caráuteres), ente otros. Amás los moos de traducción que sofita l’aplicación van dende introducción de testu fasta llectura de traducciones ensin escaecemos de traducción visual.

 

captura_mitzuli

 

Llamentablemente y nesti momentu, la nuesa llingua entá nun sofita nin la reconocencia de voz nin la traducción pela cámara, namái introducción de testu magar qu’esto nun futuru puea camudar. Sicasí, Mitzuli al tar basáu n’otros proyeutos llibres y ser tamién llibre, pues collaborar pa iguar la situación y amestar la compatibilidá d’asturianu nes estayes que falten.

 

Ensin dubies, Mitzuli ye la meyor aplicación de traducción que tenemos pa la nuesa llingua (y munches otres) inorada en cuasi tolos proyeutos comerciales. Si quies saber más y necesites baxar yá esta aplicación, pues visitar la páxina web de Mitzuli

¡¡¡TELEGRAM N’ASTURIANU YÁ TA NA PLAY STORE!!!

12 de Xunu de 2015 por enolp

Güei ye’l día de Telegram n’asturianu y ye que dempués de más d’un añu, (y dellos meses ensin anovar tresnando esti anovamientu), tamos arguyosos d’anunciar que yá podéis baxalu dende la Play Store. ¡Algamémoslo, collacios!

Google-Play
Esti pasu perimportante nun supón namái l’anovamientu automáticu de l’aplicación ensin tener dir a la páxina que toos y toes yá sabéis, sinón que tamién ufrirá la posibilidá de tener más anovamientos nel tiempu y ensin tener d’esperar meses amás de poder ver en tiempu real la cantidá de xente qu’usa/baxa/instala/desinstala l’aplicación d’un mou 100% fiable. Agora yá nun tendrás xida dala pa nun pasate dafechu a Telegram darréu que les carauterístiques qu’esti programa ufre escontra la competencia son muncho meyores, sobremanera la llibertá y la seguranza que te da saber que too furrula como debe, ensin sospeches nin falses pallabres.

telegram_play_store
La competencia ha rindise, nós tamos equí porque naguamos pola privacidá nos nuesos preseos y tamos na revolución. La competencia nun va poder con nós y sabéislo.

Arriendes d’eso, tamos arguyosos tamién d’espublizar los paquetes de pegadielles qu’apocayá anunciamos per Twitter y que de xuru van prestavos milenta. Les opciones pa instalos son, primir en caún los enllaces dende’l restolador del movil y dempués escoyer l’apertura de les URL con Telegram, darréu Telegram amosarávos un ventanu cola vista previa de les pegadielles y u namái tienes de primir n’«AMESTAR». Sicasí, si tenéis un collaciu/a que nun ye quien o nun sabe instalar les pegadielles, podéis unvia-y una y dempués dici-y qu’al primir nella va apaece-y un ventanu u namái tien de da-y a «AMESTAR A PEGADIELLES» y dempués n’otru ventanu da-y a «AMESTAR». Por embargu, si dempués d’alloriar coles pegadielles y fartucate d’amestales nun quies nin la metá d’elles, nel menú d’Axustes y na estaya “Mensaxes” tienes una opción nomada “Pegadielles” u podrás xestionar toles tos pegadielles ya incluso poder tamién compartiles dende ehí pente enllaz. ¿Quién dixo que faltaben opciones?

pegadielles
Y pa finar, nun podemos escaecemos de la bayura, pero bayura de carauterístiques nueves que trai esti anovamientu y que podréis ver na páxina de l’aplicación na Play Store. Por embargu, la páxina vieya u baxabais Telegram va dexar d’ufrir la posibilidá de baxar les versiones vieyes de Telegram n’asturianu, qu’a partir de güei queden ensin sofitu y que dempués d’unos meses van dexar de furrulavos.

Ensin más dexámosvos esfrutar coles pegadielles y l’anovamientu que marca una dómina nueva en Telegram n’ast. ¡¡¡Esfrutái!!!

Más información tocante al anovamientu: http://noticies.softastur.org/telegram

Telegram dende’l PC

19 de Xunetu de 2014 por paparresolla

Ayeri, Atopa (http://atopa.info) presentó un serviciu nuevu, la posibilidá d’usar Telegram dende un restolador web (Firefox, Chrome o Safari)

 

     

Les posibilidaes qu’ufre poder usar Telegram dende un restolador son perinteresantes: escribir con un tecláu afayadizu, usalu en dellos ordenadores y nun tener qu’instalar nada (incluso puede usase dende un móvil que tenga Firefox o Chrome).

Si yá tienes Telegram nel to móvil, nun tienes más que abrir Firefox y dir a: http://telegram.atopa.info  y pista!

Recordámosvos que si usáis Android, dende Softastur ufrímoste l’aplicación n’asturianu dende fai unos meses,  y que puedes baxala dende equí. Ensin dulda, cada vegada tenemos más caminos hacia la normalización que la nuestra llingua merez. 😉

Anovamientu de Telegram

22 de Xunu de 2014 por enolp

t_logo

Bienllegaos a la dómina de la mensaxería
rápida y segura.

VERSIÓN NUEVA – 1.5.0.4

Inclúi:

– Mou d’instalación más cenciellu
– Nuevu motor de notificaciones independiente de Google Services
– Amestada nueva galería de semeyes.
– Agora pues unviar darréu semeyes illimitaes a los tos contautos gracies a la escoyeta d’imáxenes
– Fustaxes optimizaos
– Navegación con desplazamientu n’Android 3.+
– Ameyoramientos ya igües con dellos fallos

OpenMailBox.org , un serviciu de corréu-e en llingua asturiana.

1 d'Abril de 2014 por paparresolla

Yá va tiempu que disponemos de Thunderbird y del webmail Roundcube en llingua asturiana pa xestionar el nuestru corréu. Lo que vos presentamos agora, ye OpenMailBox, un serviciu de corréu-e coles siguientes carauterístiques:

  • capacidá pa interfaz Webmail (Roundcube) y protocolos POP y IMAP.
  • respeta la to privacidá (fuck NSA!)
  • nun comparte información con terceros.
  • cifráu de los correos: la to seguridá, ta dafechu asegurada.
  • Sirvidor XMPP (compatible con chats como el de Gmail o Facebook)
  • ensin publicidá,
  • de baldre
  • interfaz en llingua asturiana 😉

Openmailbox

Lo primero que fadremos ye rexistranos y obtener una cuenta, p.ex:  el_to_nome@openmailbox.org   .

Pa rexistranos, entramos na páxina inicial, vamos a la parte d’abaxo del too, y en LANGUAGE escoyemos la llingua que nos preste. (Nota: El procesu de rexistru namái ta disponible n’inglés, francés y español. ) Una vegada rexistrada la cuenta, entramos a ella col nuesu nome d’usuariu y contraseña, (fai clic nes semeyes pa veles en grande)

111

y entramos na páxina principal. Pa cambiar les preferencies de llingua, vamos arriba a mandrecha: Axustes/Preferencies/Interfaz d’usuariu/ y escoyemos Asturianu ente les disponibles. 😉 Na mesma pantalla, más abaxo tenéis les opciones pa escoyer el tema clásicu, claru o escuru.

333

El restu, ye como un webmail normal. Mui útil cuando nun tamos nel nuestru Pc y queremos acceder al corréu.

555

Por supuestu, como vos diximos, tien serviciu IMAP, esto ye que podéis usalu nel veceru de corréu que más vos preste (recomendámosvos Thunderbird), tanto nel PC como nel smartphone. Los datos pa configuralu, son estos:

IMAP (configuración d’entrada):
  • Sirvidor: imap.openmailbox.org
  • Puertu: 143
  • Triba de seguridá: STARTTLS
SMTP (configuración de salida):
  • Sirvidor: smtp.openmailbox.org
  • Puertu: 587
  • Triba de seguridá: STARTTLS

OpenMailBox ye software llibre. Qu’esfrutéis. 😉

Telegram disponible n’asturianu

14 de Marzu de 2014 por paparresolla

t_logo

Bienllegaos a la dómina de la mensaxería
rápida y segura.

VERSIÓN NUEVA – 1.3.30 CON NOTES DE VOZ

 

LibreOffice 4.2: Rindimientu ya interoperabilidá

31 de Xineru de 2014 por Xuacu

LibreOffice

LibreOffice 4.2: enfocáu al rindimientu ya interoperabilidá,
y ameyorando la integración con Microsoft Windows.

Berlín, 30 de xineru de 2014 – The Document Foundation anuncia LibreOffice 4.2, una nueva versión principal empobinada a usuarios avanzaos, y otru pasu alantre significativu pal meyor conxuntu d’aplicaciones pa ofimática llibre de tolos tiempos. LibreOffice 4.2 presenta un un gran númberu de remociques nel rindimientu ya interoperabilidá dirixíos a tou tipu d’usuarios, pero particularmente pa los usuarios avanzaos y d’empreses. Amás, ta meyor integráu con Microsoft Windows.

Calc recibió la mayor reforma de códigu dende que se creó, lo que-y da mayores ganancies de rindimientu con grandes datos (especialmente al calcular valores de caxelles y al importar fueyes de cálculu XLSX grandes y complicaes), mentanto qu’un nuevu intérprete de fórmules opcional permite el cálculu masivu en paralelo de les caxelles de fórmules usando la GPU vía OpenCL. Esto último funciona meyor con una Arquitectura de Sistema Heteroxenea (HSA, poles sigles n’inglés) como la nueva APU Kaveri de AMD. La interoperabilidá nes dos direiciones con Microsoft OOXML; particularmente pa DOCX, igual que pal anticuáu RTF, ameyoró considerablemente. Tamién s’amestaron nuevos filtros d’importación pa documentos Abiword y presentaciones Apple Keynote.

LibreOffice 4.2 ufre dos remociques específicos en Windows pa usuarios empresariales: un diálogu simplificáu d’instalación personalizada qu’evita posibles errores, y la capacidá d’alministrar y bloquiar de mou centralizáu la configuración con Oxetos de Política de Grupos (GPO, poles sigles n’inglés) vía Active Directory. Tolos usuarios benefíciense d’una meyor integración con Windows 7 y 8, coles miniatures de documentos abiertos agrupaes agora por aplicación y una llista de documentos recientes, que s’amuesen dambos na barra de xeres.

A los usuarios avanzaos de toles plataformes va gusta-yos la flexibilidá de la ventana Configuración pa espertos, que s’amestó na llingüeta Opciones avanzaes. Esta carauterística pue desactivase fácilmente, pa los grandes despliegues y pa usuarios básicos.

Libreoffice 4.2 ufre una nueva pantalla d’aniciu, con un diseñu más llimpiu que fai meyor usu del espaciu disponible – incluyendo pantalles pequeñes – y amuesa una vista previa de los últimos documentos.

No que cinca a móviles,Libreoffice agora tien sofitu pa Control Remotu d’Impress pa iOS – amás del Control Remotu d’Impress pa Android yá disponible – que permite la xestión visual del ritmu d’una presentación nel portátil usando la pantalla d’un iPhone o un iPad. Esta app anguaño ta esperando la revisión d’Apple y anunciaráse en cuantes tea disponible na iTunes Store.

LibreOffice 4.2 ye’l primer conxuntu d’aplicaciones d’ofimática llibres qu’incorpora una nueva función d’accesibilidá pa Windows (basada en IAccessible2) desendolcada por IBM. Pa esta versión considérase esperimental, pero sustituirá a l’anterior accesibilidá basada en Java na siguiente versión principal.

La Interfaz d’usuariu de Libreoffice sigue recibiendo una llimpieza significativa con un 70% de los diálogos anovaos y munchos axustes de la interfaz distribuíos. Esta versión tamién incluye un guapu tema nuevu d’iconos «planos» – Sifr – y un conxuntu anováu d’estilos de documentu predeterminaos.

Toles funciones nueves y ameyoraes de LibreOffice 4.2, incluyendo les que nun apaecen equí, tán resumíes nesta páxina web: https://www.libreoffice.org/download/4-2-new-features-and-fixes/.

Alcontrase cola comunidá

A principios de febreru, la comunidá de LibreOffice reuniráse nel FOSDEM 2014 en Bruxeles, onde los desendolcadores presentarán na Open Document Editors DevRoom les últimes y más importantes teunoloxíes integraes por Libreoffice, y otros voluntarios alcontraránse con promotores del software llibre nel puestu de LibreOffice.

A principios de marzu, The Document Foundation participará nel CeBIT de Hannover pa presentar LibreOffice 4.2: Sala 6, Puestu H14.

Descargar LibreOffice

Libreoffice ta disponible inmediatamente pa descargar dende l’enllaz siguiente: http://www.libreoffice.org/download/.
Les estensiones pa Libreoffice tan disponibles nel siguiente enllaz: http://extensions.libreoffice.org/extension-center.

Sofitu a The Document Foundation

Los usuarios de LibreOffice, propagandistes del software llibre y miembros de la comunidá puen dar sofitu a The Document Foundation con una donación en http://donate.libreoffice.org. El dineru collecháu s’usará pa facer medrar la infraestructura y dar encontu a actividaes publicitaries p’aumentar el conocimientu del proyeutu, tanto a nivel global como a nivel llocal.

Gracies al trabayu de dalgunos proyeutos de llingua nativa y voluntarios, esta nota de prensa ta disponible n’inglés, n’árabe, neerlandés, francés, gallegu, alemán, italianu, xaponés, portugués brasileñu, esloveno, español y turcu nesta páxina: http://blog.documentfoundation.org/libreoffice-4-2/. Nel futuru amestaránse más llingües.

Enllaz curtiu al blog de The Document Foundation: http://wp.me/p1byPE-sG.

Medibuntu: adiós y munches gracies

15 d'Ochobre de 2013 por Xuacu

medibuntu-logo_64Hebo un tiempu en que pa poder ver determinaos conteníos de la rede, los usuarios de les distribuciones de Linux teníamos que «buscanos la vida» p’alcontrar distintos complementos, biblioteques o programes y, de vezu, compilar fontes de software non-llibre.
Dempués, gracies al trabayu de distintes persones, apaecieron paquetes yá preparaos pa les distintes distribuciones. Pero siguíen esistiendo dos problemes: había qu’alcontralos pela rede, echando tiempu nos buscadores, y podíen ser paquetes pa versiones anteriores de la distribución, que dacuando daben problemes de compatibilidá.
Too esto ameyoró enforma cola llegada de Medibuntu, un repositoriu de paquetes non llibres de multimedia pa Ubuntu, que permitía tener accesu fácil a paquetes actualizaos dende’l propiu Centru de Software del sistema.
Pero toles coses lleguen al so final, y agora toca-y a Medibuntu. Col pasu del tiempu bona parte de los paquetes pasaron a tar integraos dientro de los repositorios oficiales, otros yá nun son necesarios o tan anticuaos, y l’únicu que, por cuestiones llegales, nun pue tar integráu n’Ubuntu (libdvdcss), úfrese dende Videolan. Poro Gauvain Pocentek, encargáu de Medibuntu, decidió que yá nun ye necesario caltener el repositoriu. Si teníeis Medibuntu activáu nos oríxenes del software, hai díes que taréis recibiendo mensaxes d’error nos anovamientos del software d’Ubuntu.
Pa desactivar el repositoriu de Medibuntu hai que dar nun terminal la orde siguiente:
sudo rm /etc/apt/sources.list.d/medibuntu.list
Pa usar el repositoriu de Videolan, que da accesu a libdvdcss (necesario pa reproducir dvds protexíos) son necesarios los siguientes comandos:
curl ftp://ftp.videolan.org/pub/debian/videolan-apt.asc | sudo apt-key add -
echo "deb ftp://ftp.videolan.org/pub/debian/stable ./" | sudo tee /etc/apt/sources.list.d/libdvdcss.list
sudo apt-get update

Y si t’alcuentres pela rede foros o artículos que redirixen a Medibuntu, por favor, informa a los llectores de qu’esa solución yá nun ye válida.
De mou que munches gracies a toles persones que collaboraron pa que los usuarios d’Ubuntu tuviéramos accesu a los mesmos conteníos (y más, munches veces) que los usuarios d’otros sistemes operativos.
Equí ta la noticia n’inglés nel blog de Gauvain Pocentek.

Abandonóte Apple… nosotros non

26 de Xunetu de 2013 por Dangerous Piper
El procesu esplicáu n’esti artículu ye la traducción de la páxina n’inglés de TenFourFox, recomendámoste que uses la web orixinal pa baxar la versión ultima publicada.

Apple ye una d’eses empreses que faen ordenadores pa que duren poco. Una de les téuniques qu’usen, al marxe de les incompatibilidaes hacia atrás nos sos sistemes operativos, ye cambiar la plataforma de hardware sobre la que trabayen: Primero de Motorola 68000 a PowerPC y depués de PowerPC a Intel.

Pues esto pon torgues non sólo al usuariu sinón tamién a los desendolcadores, que namás acaben ufriendo el so software pa les últimes versiones de MacOs X.

Esto sería dramáticu si nun fuere pol software llibre, ya que anque pa Apple un equipu fabricáu en 2006 y con procesador dual ye obsoletu y nun val pa restolar per internet, los necios del software llibre siguen compilando versiones de software modernu y non sólo pa los equipos de 2006, tamién pa los powerPC de 1994…

Debian ye una mui bona opción pa siguir usando ún d’estos equipos que les multinacionales quieren que tires a la basura pa siguir col negociu. Sicasí, polos motivos que seyan, hai xente que prefier siguir usando un sistema inseguru y ensin sofitu como ye MacOS X en PowerPC. Esta xente si quier restolar pel internet de 2013 nun pue facelo col software d’Apple, Safari, nin siquiera con Firefox… pero Firefox ye software llibre y equí apaez TenFourFox.

TenFourFox n'asturianu

TenFourFox n’asturianu

TenFourFox ye una derivación del modernu Firefox compiláu pa maquines PowerPC con sistemes Mac OS X 10.4 o superiores (pa sistemes Mac OS 8.6-9.2.2 a Mac OS X 10.3.9 recomendamos Classilla) y agora ta disponible n’asturianu.

Lo primero ye baxar la versión adecuada pal nuesu procesador:

*Cualquier versión pa G4 va funcionar nun G4, sicasí hai versiones optimizaes pa les series 7400 y 7450, pa saber la serie del to G4 abri una terminal y executa el comandu:

$ machine

Imprentará “ppc7400” o “ppc7450” según la serie.

Instalador del asturianu pa TenFourFox

Instalador del asturianu pa TenFourFox

Cuando yá lo tengamos, estrayemos el ficheru del zip y  copiámoslu na carpeta “Applications” (o n’onde guardes normalente les aplicaciones).
Con esto tendríes TenFourFox n’inglés, pa ponelu n’asturianu baxamos esti instalador estrayemos y executamos (con TenFourFox zarráu). Siguimos los pasos del asistente y al final tendremos TenFourFox n’asturianu.

Nun escaezas editar en “Preferencies/Conteníu” la llingua preferida pa les páxines webs.