Archivu d'autor

Presentación d’Android n’asturianu

23 de Xunu de 2014 por Dangerous Piper

presentación

Abandonóte Apple… nosotros non

26 de Xunetu de 2013 por Dangerous Piper
El procesu esplicáu n’esti artículu ye la traducción de la páxina n’inglés de TenFourFox, recomendámoste que uses la web orixinal pa baxar la versión ultima publicada.

Apple ye una d’eses empreses que faen ordenadores pa que duren poco. Una de les téuniques qu’usen, al marxe de les incompatibilidaes hacia atrás nos sos sistemes operativos, ye cambiar la plataforma de hardware sobre la que trabayen: Primero de Motorola 68000 a PowerPC y depués de PowerPC a Intel.

Pues esto pon torgues non sólo al usuariu sinón tamién a los desendolcadores, que namás acaben ufriendo el so software pa les últimes versiones de MacOs X.

Esto sería dramáticu si nun fuere pol software llibre, ya que anque pa Apple un equipu fabricáu en 2006 y con procesador dual ye obsoletu y nun val pa restolar per internet, los necios del software llibre siguen compilando versiones de software modernu y non sólo pa los equipos de 2006, tamién pa los powerPC de 1994…

Debian ye una mui bona opción pa siguir usando ún d’estos equipos que les multinacionales quieren que tires a la basura pa siguir col negociu. Sicasí, polos motivos que seyan, hai xente que prefier siguir usando un sistema inseguru y ensin sofitu como ye MacOS X en PowerPC. Esta xente si quier restolar pel internet de 2013 nun pue facelo col software d’Apple, Safari, nin siquiera con Firefox… pero Firefox ye software llibre y equí apaez TenFourFox.

TenFourFox n'asturianu

TenFourFox n’asturianu

TenFourFox ye una derivación del modernu Firefox compiláu pa maquines PowerPC con sistemes Mac OS X 10.4 o superiores (pa sistemes Mac OS 8.6-9.2.2 a Mac OS X 10.3.9 recomendamos Classilla) y agora ta disponible n’asturianu.

Lo primero ye baxar la versión adecuada pal nuesu procesador:

*Cualquier versión pa G4 va funcionar nun G4, sicasí hai versiones optimizaes pa les series 7400 y 7450, pa saber la serie del to G4 abri una terminal y executa el comandu:

$ machine

Imprentará “ppc7400” o “ppc7450” según la serie.

Instalador del asturianu pa TenFourFox

Instalador del asturianu pa TenFourFox

Cuando yá lo tengamos, estrayemos el ficheru del zip y  copiámoslu na carpeta “Applications” (o n’onde guardes normalente les aplicaciones).
Con esto tendríes TenFourFox n’inglés, pa ponelu n’asturianu baxamos esti instalador estrayemos y executamos (con TenFourFox zarráu). Siguimos los pasos del asistente y al final tendremos TenFourFox n’asturianu.

Nun escaezas editar en “Preferencies/Conteníu” la llingua preferida pa les páxines webs.

Taller d’Ubuntu en Les Arriondes

17 de Mayu de 2012 por Dangerous Piper

Mañana vienres 18 de mayu de 2012 a les 18:00

na Casa La Cultura de Les Arriondes (Parres) va celebrase un taller de baldre y abiertu a tolos que quieran instalar Ubuntu, un sistema operativu llibre y gratuitu disponible n’asturianu, entre otros idiomes.

El colectivu de voluntarios Softastur, dedicáu a la traducción de Software Llibre al asturianu, la comunidá d’usuarios Ubuntu Asturies y la empresa de servicios dixitales Korama entamen un taller d’entrada llibre y gratuita (requier inscripción previa) pa deprender a instalar y utilizar el sistema opertativu llibre Ubuntu n’asturianu, o en cualesquier otra llingua si se desease.

Esti sistema puede convivir con otros, como puede ser Windows, nel mesmu equipu lo que facilita el procesu d’adautación.

Ubuntu inclui amás una bultable cantidá de software que permite facer too tipo de xeres, que van dende la más cenciella redaición d’un testu a la edición de video, el retoque fotográfico o trabayar como sirvidor de páxinas web n’internet, por poner unos exemplos.

Xeres como grabar cd, compartir ficheros en redes p2p, reproducir películes o música tan afayadices na instalación básica del sistema. Colo que nun fai falta andar a la gueta de software adicional pa les xeres más cotidianes.

Anguaño Ubuntu alcuentrase na versión 12.04 marcada como LTS (Long Term Support) lo que quier dicir que tendrá soporte y actualizaciones nos prosimos cinco años.

Pa evitar esperes innecesaries y pa facer una instalación segura, ye importante enantes de dir al taller siguir les instrucciones detallaes en http://docu.softastur.org/Install

Manifiestu d’apoyu a les radios llibres asturianes

13 de Febreru de 2012 por Dangerous Piper

Dende Softastur queremos mostrar la nuestra protesta más firme pola
actuación de la Xefatura Provincial de Telecomunicaciones d’Asturies
respecto de les emisores comunitaries.

La Xefatura Provincial de Telecomunicaciones d’Asturies, dependiente de
la Secretaría d’Estáu de Telecomunicaciones y pa la Sociedá
d’Información (Ministeriu d’Industria, Turismu y Comerciu) entamó
l’unvíu de cartes a les comunidaes de propietarios onde s’asitien los
equipos d’emisores de radios non autorizaos. Nelles ríquen-yos
información de la titularidá de los equipos y infórmenlos de les
sanciones posibles que lleguen hasta multes de 500.000 €.

Consideramos que l’envís de la midida ye en cierto’l presionar a estes
emisores y asustar a les comunidaes de propietarios que dieron el preste
a la instalación d’equipos.

(más…)

¿Por qué Softastur cambia la so cuenta en Facebook?

5 de Febreru de 2011 por Dangerous Piper

Dende va unos meses, venimos anunciando el cambéu de la cuenta en Facebook de Softastur (cuenta como la d’un usuariu corriente) a una páxina http://www.facebook.com/pages/Softastur/140649923185

El motivu d’esti cambéu nun ye otru que respetar la privacidá de la xente que nos sigue vía Facebook.

Cuando ficimos la cuenta, por desconocimientu, ficimos una cuenta d’usuariu común y corriente y entamamos a añadir a la xente que mos quería siguir como “Friends”, pero col pasu del tiempu dímonos cuenta de que teníemos accesu a tolos datos de xente que naide de Softastur conoz, esto incluye les semeyes y los datos personales de contautu y tolos mensaxes que los distintos “Friends” compartíen colos sos verdaderos “Friends”.

Como nun nos interesen estos datos, y como queremos respetar la privacidá de los usuarios lo mesmo que queremos que respeten la nuesa propia privacidá, decidimos abrir una páxina http://www.facebook.com/pages/Softastur/140649923185 onde cualesquier usuariu de facebook puede siguir la nuesa actividá ensin tener que compartir con nosotros les semeyes de la so borrachera última. La cuenta habitual de Softastur lleva un procesu “d’apagáu” progresivu que finará la selmana qu’entra col desanicie de tolos collacios asociaos.

Queremos pidir disculpes poles molesties causaes y agradecevos a les más de 600 persones que llegastis a siguinos col usuariu que agora desaniciamos.

El diccionariu de Softastur pasa a beta pública

31 d'Avientu de 2009 por Dangerous Piper

Por fín tenemos el motor del diccionariu completu, y depués de varios meses faciendo pruebes, mañana día 1 a les 00:00:01 hores tará disponible pa la consulta de quien quiera.

Esti diccionariu ye frutu de la collaboración de Softastur y l’Academia de la Llingua Asturiana, si quies saber más puedes lleer la páxina d’entrugues más frecuentes.

En unos díes unviaremos una nota de prensa completa con tola información del proyeutu y material gráficu.

diccionariu

Diccionariu de Softastur

Manifiestu “Na defensa de los drechos fundamentales n’internet”

2 d'Avientu de 2009 por Dangerous Piper

Cola inclusión nel Anteproyectu de Llei d’Economía sustentable de modificaciones llexislatives qu’afeuten al llibre exerciciu de les llibertaes d’espresión, información y el derechu d’accesu a la cultura a traviés d’Internet, los periodistes, blogueros, usuarios, profesionales y creadores d’internet manifestamos la nuestra firme oposición al proyeutu, y declaramos que:

1. Los derechos d’autor nun se pueden situar penriba de los derechos fundamentales de los ciudadanos, como’l derechu a la privacidá, a la seguridá, a la presunción d’inocencia, la tutela xudicial efectiva ye la llibertá d’espresión.

2. La suspensión de derechos fundamentales ye y tien de siguir siendo competencia esclusiva del poder xudicial. Nun se zarra ensin sentencia. Esti anteproyeutu, en contra de lo establecío nel artículu 20.5 de la Constitución, pon en manes d’un órganu non xudicial -un organismu dependiente del Ministeriu de Cultura-, la potestá d’impedir a los ciudadanos asturianos y españoles l’accesu a cualesquier páxina web.

3. La nueva llexislación creará inseguridá xurídica en tol sector teunolóxicu asturianu y español, perxudicando una de les poques estayes de desenvolvimientu y futuru de la nuestra economía, obstaculizando la creación d’empreses, introduciendo pilancos a la llibre competencia y ralentizando la so proyección internacional.

4. La nueva llexislación propuesta amenaza a los nuevos creadores y obstaculiza la creación cultural. Con Internet y los sucesivos avances tecnolóxicos democratizáronse de forma granible la creación y la emisión de conteníos de tou calter, que yá nun vienen prevalentemente de les industries culturales tradicionales, sinón de multitú de fontes diferentes.

5. Los autores, como tolos trabayadores, tienen derechu a vivir del so trabayu con nueves idegues creatives, modelos de negociu y actividaes asociaes a les sos creaciones. Intentar sustener con cambeos llexislativos una industria obsoleta que nun sabe adautase a esti nuevu entornu nun ye xusta nin realista. Si’l so modelu de negociu se basaba nel control de les copies de les obres y n’Internet nun ye posible ensin vulnerar los derechos fundamentales, deberíen buscar otru modelu.

6. Consideramos que les industries culturales necesiten pa sobrevivir alternatives modernes, eficaces, creyibles y asequibles, y que s’amolden a los nuevos usos sociales, en llugar de llimitaciones tan desproporcionaes como ineficaces cola fin que dicen perseguir.

7. Internet tien que funcionar de forma llibre y ensin interferencies polítiques agospiaes por sectores que pretenden perpetuar obsoletos modelos de negociu y imposibilitar que’l saber humanu siga llibre.

8. Esiximos que’l Gobiernu garantice por llei la neutralidá de la Rede n’Asturies y n’España, ante cualisquier presión que pueda producise, como marcu pal desenvolvimientu d’una industria sostenible y realista de cara al futuru.

9. Proponemos una verdadera reforma del derechu a la propiedá intelectual orientada a la so finalidá: devolver a la sociedá’l conocimientu, promover el dominiu públicu y llimitar los abusos de les entidaes xestores.

10. En democracia les lleis y les sos modificaciones tienen d’aprobase tres l’oportunu debate públicu y teniendo que consultalo previamente toles partes implicaes. Nun ye de recibu que se faigan cambeos llexislativos qu’afeuten a los derechos fundamentales nuna llei non orgánica y que versa sobre otra materia.

NOTA: Esti manifiestu redautóse conxuntamente por periodistes, blogueros y internautes, nuna maratoniana sesión durante la tarde-nueche d’ayeri (1 d’avientu). Si tas d’alcuerdu, difúndilu tanto como puedas.

Taller d’Instalación n’Uviéu

20 de Payares de 2009 por Dangerous Piper

NOTA DE PRENSA

VERSIÓN EN CASTELLANO |   DESCARGAR VERSIÓN BILINGÜE EN PDF

SOFTASTUR Y LA XUNTA POLA DEFENSA DE LA LLINGUA ENTAMEN UNES XORNAES SOBRE SOFTWARE LLIBRE N’ASTURIANU

Güei vienres 20 de payares a les 19:00 y mañana sábadu 21 a partir de les 9:00
nel Llar Solidariu d’Uviéu van celebrase una charra y un taller, respeutivamente, de baldre y abiertu a tolos que quieran instalar Ubuntu, un sistema operativu llibre y gratuitu disponible n’asturianu, ente otres llingües.

El colectivu de voluntarios Softastur, dedicáu a la traducción de Software Llibre al asturianu, y la Xunta Pola Defensa de la Llingua Asturiana entamen una charra y un taller d’entrada llibre y gratuita pa deprender a instalar y utilizar el sistema opertativu llibre Ubuntu (GNU/Linux) n’asturianu.

El sistema puede convivir con otros, como puede ser Windows, nel mesmu equipu lo que facilita el procesu d’adautación.

Ubuntu inclui amás una bultable cantidá de software que permite facer too tipo de xeres, que van dende la más cenciella redaición d’un testu a la edición de videu y el retoque fotográficu, hasta trabayar como sirvidor de páxines web n’internet, por poner unos exemplos.

Xeres como grabar cd, compartir ficheros en redes p2p, reproducir películes o música tan disponibles na instalación básica del sistema. Colo que nun fai falta andar a la gueta de software adicional pa les xeres más cotidianes.

Toes estes aplicaciones básiques qu’inclui Ubuntu ya tan tornaes al asturianu, pero nun son les uniques. Yá tan disponibles la suite de preseos educativos Edubuntu, y mui pronto tarán disponibles tamién la suite ofimática OpenOffice y otres distribuciones GNU/Linux como Fedora.

Les persones interesaes en instalar el sistema nel so equipu (y que quieran mantener el sistema actual) tienen de consultar la web:
http://wiki.softastur.org/install

MATERIAL GRÁFICU

Semeyes d’otros talleres:
Xixón, 16-05-2009
http://wiki.softastur.org/Ubuntu:Install_party_en_Xix%C3%B3n
Sama (Llangréu), 16-01-2009
http://wiki.softastur.org/Ubuntu:Ubunt%C3%ADzate_en_Sama

Cartel:
http://www.flickr.com/photos/tapaponga/3989100871/

(más…)

Completóse la traducción d’OpenOffice.org

15 de Payares de 2009 por Dangerous Piper

NOTA DE PRENSA

VERSIÓN EN CASTELLANO |   DESCARGAR VERSIÓN BILINGÜE EN PDF

SOFTASTUR COMPLETA LA TRADUCCIÓN AL ASTURIANU DE LA SUITE OFIMÁTICA OPENOFFICE.ORG

La versión va tar disponible pa los usuarios de cualisquier sistema operativu a partir de la versión 3.2 de OpenOffice.org, que s’espublizará en próximes feches.

El colectivu de voluntarios Softastur ta acabante de completar la torna al asturianu de la suite ofimática OpenOffice.org. La versión nueva tará a disposición de los usuarios de cualisquier sistema operativu (GNU/Linux, Windows, Mac Os, etc) a partir de la versión 3.2 d’esti paquete de ferramientes informátiques, que s’espublizará en próximes feches.

OpenOffice.org ye anguaño el principal competidor de la suite ofimática privativa Microsoft Office, y la so penetración vien medrando de forma bultable nos años últimos, especialmente nel mercáu empresarial, profesional y alministrativu. Los últimos estudios espublizaos coinciden en que na redolada’l 15% de los usuarios de Windows nel mundu tienen instaláu esti paquete, y ye la opción mayoritaria en sistemes GNU/Linux.

La so traducción al asturianu supunxo más de dos años de trabayu pa los voluntarios de Softastur, nel que contaron col conseyu de l’Academia de la Llingua Asturiana. La torna d’Open Office ye, además, el segundu proyeutu de mayor volume completáu pol colectivu, tres de la distribución Ubuntu del sistema operativu  GNU/Linux.

Cola próxima espublización de la versión 3.2 de OpenOffice.org, los usuarios qu’asina lo deseen van poder contar con un procesador de textos (Writer), la fueya de cálculu (Calc) o el programa d’elaboración de presentaciones (Impress), ente dellos otros recursos, dafechu n’asturianu.

OpenOffice.org surdió de la suite StarOffice, desarrollada por StarDivision, que foi alquirida en 1999 por Sun Microsystems. Nel añu 2000, lliberóse’l so códigu fonte pa tentar de facer frente a Microsoft Office. Anguaño, el so códigu fonte distribúise embaxo llicencia LGPL y se puede descargar de baldre dende’l sitiu n’internet openoffice.org. La suite compónse del procesador de textos Writer, la fueya de cálculu Calc, la ferramienta de presentaciones Impress, la base de datos Base, l’editor de gráficos Draw y l’editor de fórmules matemátiques Math.

Pa más detalles, y captures de pantalla visitar l’artículu en Ta pa Ponga.

(más…)

Softastur entama un taller en Sietes pa promocionar el Software Llibre

16 d'Ochobre de 2009 por Dangerous Piper

NOTA DE PRENSA

VERSIÓN EN CASTELLANO |   DESCARGAR VERSIÓN BILINGÜE EN PDF

SOFTASTUR ENTAMA UN TALLER EN SIETES PA PROMOCIONAR EL SOFTWARE LLIBRE FRENTE AL PRIVATIVU

El sábadu 17 d’ochobre de 2009 a les 10:30 na Plaza’l Güevu de Villaviciosa

será el puntu de reunión pa tolos que quieran participar na actividá.

El colectivu de voluntarios Softastur, sofitaos por Asturlinux y l’equipu llocal d’usuarios d’Ubuntu p’Asturies, entamen un taller llúdicu tocante al Software Llibre en xeneral y GNU/Linux en particular.

Durante el taller, amás de compartir conocimientos, esperiencias y duldes, grabaráse un videu promocional de GNU/Linux pa destacar les bondaes d’esti sistema frente a otros privativos, como sátira de la campaña que vien faciendo la multinacional estaunidense Microsoft pa la versión nueva del so sistema privativu Windows.

Softastur, yá fuera de toles connotaciones étiques que conlleva l’usu del Software Llibre, quier destacar la necesidá d’usar nos equipos informáticos un sistema estable, robustu y seguru. Dalgo que col software privativu ye dificil d’asegurar, al nun facilitar el códigu y al nun ser l’usuariu propietariu del software qu’instala na so máquina.

El fechu de que GNU/Linux pueda obtenese llegalmente de baldre, que nun-y afecten los virus, ya son unos importantes argumentos a favor d’esti sistema llibre, pero Softastur quier destacar la importancia de disponer de más de 200 llingües pal interfaz del sistema, ente los que s’alcuentra l’asturianu, consideráu pola comunidá de desendolcadores como una de las 26 llingües más desarrollaes del sistema, xunto col francés, castellanu, inglés, catalán o chinu entre otres.

Softastur quier convidar tanto a usuarios de Software Llibre como a primerizos a participar d’esti día en Sietes. Los vídeos que van grabase durante l’actividá van amosase na páxina web www.sietesunpuebludespertos.com
(más…)